د سولې او ملي یووالي په ټینګښت کې د ولایتي شوراګانو رول مهم او اساسي دي!
دغه څرګندونې د سرحدونو او قبایلو چارو وزیر ښاغلي محب الله صمیم نن له غرمې مخکې د هېواد ولایتي شوراګانو له مشرانو او غړو سره په کتنه کې وکړې.
د یادې کتنې په پیل کې، چې د کابل، لوګر، غزني، میدان وردګ، لغمان، ننګرهار، دایکندي او یو شمېر نورو ولایتونو د ولایتي شوراګانو مشرانو او غړو شتون درلود، د یو شمېر شوراګانو استازو خبرې وکړې وې ویل: د سرحدونو او قبایلو چارو وزارت د هېواد د مېشتو ټولو قومونو ګډ کور دی او ټول قومونه باید پکې ځان وویني نوموړو د سرحدونو او قبایلو چارو وزیر ښاغلی محب الله صمیم په هېواد، ولسونو او ملي ارزښتونو میین شخص یاد کړ او د هېواد په ولایتونو کې د نظام، جمهوریت، اوربند او باعزته سولې د ملاتړ په پار د لویو ولسي غونډو د جوړېدو قدرداني وکړه او له خپل اړخه یې په دې برخو کې د همکارۍ ډاډ ورکړ.
د غونډې ګډونوالو د خپلو ولسونو سیمه ییزې ستونزې د حل په موخه له ښاغلي صمیم سره شریکې کړې، همدارنګه یې ډاډ ورکړ، چې د وزارت لخوا به په لویو ولسي غونډو کې پراخه برخه اخلي.
ورپسې ښاغلي محب الله صمیم خبرې وکړې وې ويل: د ولایتي شوراګانو مشران او استازي کولای شي، چې د سولې او ملي یووالي په ټینګښت کې مهم او اساسي رول ولوبوي او په دې برخو کې یې له دوی څخه د همکاریو او ملاتړ غوښتنه وکړه.
ښاغلي صمیم زیاته کړه، هغه واټن چې د بېلابېلو ناخوالو او نا امنیو له امله د حکومت او ولسونو ترمنځ رامنځته شوی، موږ به یې انشاالله ستاسو په همکارۍ بېرته را لنډ کړو، تر څو شته جمهوري نظام مو پیاوړی او ولسونو ته مو پر وخت غوره خدمات وړاندې شي. په پای کې ښاغلي صمیم دوی ته ډاډ ورکړ، چې د خپلو ولسونو بېلابېلې ستونزې به د حل په موخه له اړوندو ادارو سره شریکوي.
