د سولې او امنیت په ټینګښت کې د قومي مشرانو ونډه مهمه ده!
د کندوز ولایت د سرحدونو او قبایلو چارو ریاست د جرګو په تالار کې نن سه شنبه د(وږي۴مه۱۳۹۹) په سوله او امنیت کې د قومي مشرانو ونډې تر عنوان لاندې غونډه وشوه.
په دې غونډه کې د کندوز بېلا بېلو قومي شوراګانو مشرانو او ګڼ شمېر قومي مخورو ګډون کړی وو.
د کندوز سرحدونو او قبایلو چارو رئیس نظیف الله نظیف غونډې ته د وینا پر مهال وویل، د ولسونو ارادې نه ماتېدونکې دي، قومي مشران د سولې او امنیت په برخه کې بنسټیزې پایې دي، د قومي مخورو رول د فکري رغونې، سولې، ملي یووالي او امنیت په برخو کې خورا مهم او ارزښت لرونکی دی.
غونډې ته د قومي مخورو په استازولۍ حاجي میرزا محمد لغماني، حاجي غوث الدین فاریابي، د ناصرو د قومي شورا مشر حاجي اغامیر ناصري، ظابط عزیز الله، د ابراهیم خیلو د قومي شورا مشر ډاکټر عتیق الله رشیدي او کندوز کې د اندرابیو د قومي شورا مشر عبدالحق حقجو خبرې وکړې.
دوي د سولې او امنیت د ټینګښت لپاره ملي یووالی اړین یاد کړ، زیاته یې کړه، چې له ملي پروسو ملاتړ او ملي ګټې ساتل د هر افغان مسئولیت دی او په ټول توان سره به ورته کار کوي.
غونډه په شمال ختیځ زون کې د عربانو د انسجام شورا مشر حاجي عبدالکریم عرب په دعا سره پای ته ورسېده.
