د رياست الوزراء له خوا د سرحدونو، قومونو او قبایلو چارو وزارت په سرپرستي ټاکل شوی لوړ رتبه هيئت د بدخشان ولايت له والي سره وکتل
۱۴۴۴/۵/۵ هجري قمري
ياد هيئت چي د سرحدونو، قومونو او قبایلو چارو وزارت د دفتر رئيس شيخ حضرت ولي حقاني، د اطلاعاتو اوعامه اړيکو رئيس حمدالله فطرت، د قومي چارو سلاکار امين الله پاميري او پېښو ته د رسېدو په چارو کې د دولت وزارت د بشري زېرمو رئيس حافظ محمودالحسن يې غړېتوب لري نن د بدخشان ولايت له والي مولوي امان الدين منصور سره وکتل.
ياد هيئت چې د کابينې د پريکړې سره سم موظف شوی وو د بدخشان ولايت واخان ولسوالۍ پاميرونو ته ژمنۍ مرستې انتقال کړي پر همدې بنسټ يې له مولوي امان الدين منصور سره مشورتي ناسته تر سره کړه.
د يادونې وړ ده چې د پاميرونو لپاره ژمنۍ مرستې چي شاوخوا ۲۴ قلمه خوراکي او غير خوراکي توکي دي او سل عدده سترې خېمې هم پکې شاملې دي د ملي دفاع وزارت په لسو سترو نقليه وسايطو کې د واخان ولسوالۍ مرکز خندود ته انتقال شوي چي د ياد هيئت له خوا به د ولايت د ناظرينو په شتون کې توزيع شي.
