د خوشحال خان عالي لېسې په انګړ کې سلګونه نیالګي کېنول شول
چهارشنبه ۲۲/ شعبان المعظم/ ۱۴۴۴
د سرحدونو، قومونو او قبایلو چارو وزارت اړوند د خوشحال خان عالي لېسې په انګړ کې څه باندې څلور سوه زینتي او غیر زینتي نیالګي کېنول شول.
د نیالګیو کېنولو پر مهال د یاد وزارت د جرګو او قبایلي چارو د همغږۍ معین ښاغلي الحاج ملا عبدالخالق عابد، د یاد وزارت د ښوونې او روزنې رئیس مولوي عبدالرحمن رحماني، د اطلاعاتو او عامه اړیکو رئیس ملا حمدالله فطرت، د سرحدي تخطیو د بررسي رئیس مولوي منصور، د همدې لیسې آمر ښاغلی محمدي او مل پلاوي حضور درلود.
د سرحدونو ،قومونو او قبايلو چارو وزارت د جرګو او قبایلي چارو د همغږۍ معین ښاغلي عابد د نیالګیو کينولو پر مهال پخپلو خبرو کې وویل: د هیواد د سمسورتیا او ښيرازي په برخه کې د نیالګیو کېنول یوه اړينه چاره ده په وينا يې د هیواد د هر وګړي لپاره ضروري ده چې په دې برخه کې خپله ونډه واخلي. هغه د یادې لېسې له مسؤلینو او زده کوونکو څخه وغوښتل چې د نیالګیو د ساتنې او پالنې په برخه کې ځانګړې پاملرنه وکړي.
