د خوست ولایت د ولسونو او قومونو ستونزې واورېدل شوې!
د سرحدونو او قبایلو چارو وزیر ښاغلي محب الله صمیم نن له غرمې مخکې د خپل کار په دفتر کې د خوست ولایت له یو شمېر قومي مشرانو او مخورو سره وکتل.
په دې کتنه کې راغلو قومي مشرانو خپلې یو لړ سیمه ییزې ستونزې چې د پوهنې، روغتیا، پراختیایي پروژو د تطبیق او نورو برخو کې وې د حل په موخه د وزارت له مشرتابه سره شریکې کړې د ولسي بسیج، د قومي جوړښتونو د پیاوړتیا، سولې ټینګښت او په بېلابېلو ولایتونو کې د ولسي غونډو او جرګو له لارې د نظام ملاتړ ته د خلکو رابللو په برخو کې د محترم محب الله صمیم هڅې او لاسته راوړنې وستایلې.
ورپسې ښاغلي محب الله صمیم خبرې وکړې وې ویل: د خوست ویاړلیو ولسونو تل د نظام ساتنې لپاره قرباني ورکړي او دغه راز یې تل د سولې او پر مخالفینو د اوربند غږ اوچت کړی، چې موږ مو د دې هڅو قدرداني کوو، دغه راز یې دوی ته ډاډ ورکړ، چې ستونزې به مو د تل په څېر د حل لپاره له اړوندو ادارو سره شریکې کړو.
