د جینوا کنفرانس په اړه د پوهاوي ورکشاپ
یاد ورکشاپ د سرحدونو او قبایلو چارو وزارت د بشري زېرمو ریاست لخوا د ۱۳۹۹ لمریز کال د سلواغې پر ۱۵ نېټه جوړ شو. په دې ورکشاپ کې د سرحدي څېړنو معین ښاغلي ډاکتر محمد اصف قاضیزاده، د جرګو او قبایلي چارود همغږۍ معین ښاغلي محمد یعقوب احمدزي، رئیسانو او کارکوونکو ګډون کړی و.
په پیل کې د بشري زېرمو رئیس ښاغلي محمد یاسین پکتین په لنډه توګه د جینوا کنفرانس د مرستو،شرایطو او ژمنو په اړه خبرې وکړې، د فساد پر وړاندې په مبارزه ټینګار او د فساد د مخنیوي لپاره یې اصلاحات اړین وبلل.
ورپسې د وزارت د جرګو او قبایلي چارو معین ښاغلي الحاج محمد یعقوب احمدزي هم په دې اړه خبرو کې اهل کارته د کار په سپارلو، له ځان څخه د اصلاحاتو په پیلولو ، دندې ته پرژمنتیا، پابندۍ او له قانون سره سم د مسولیتونو په ترسره کولو ټینګار وکړ.هیله یې څرګنده کړه، چې په هېواد کې یې سوله ټینګښت ومومي او د تل لپاره د بد مرغیو او فساد ټغر ټول شي. له کارکوونکو یې وغوښتل چې د فساد پر وړاندې جدي مبارزه وکړي.
دغه رازښاغلي استاد زهیر د جینوا کنفرانس په اړه ترتیب کړي پریزنتیشن کې د جینوا کنفرانس د جوړېدو پر څرنګوالي، موخو ،چوکاټ، شرطونو، د جینوا د مخکنیو او وروستي کنفرانس تر منځ د توپیر او د بېلا بېلو هېوادونو له خوا د ژمنه شویو مرستو په اړه معلومات وړاندې کړل. وې ویل:چې ډېری هېوادونو د نورو شرطونو تر څنګ د سولې خبرو ته په پابندۍ او اوربند ټینګار کړی دی. په پایله کې د هر ډول اداري فساد پر وړاندې په جدي مبارزه ټینګار وشو.
