د جوزجان په مرکز کې له قومي استازو سره د همغږۍ ناسته
۱۸/۲/۱۴۴۵
د جوزجان ولایت په مرکز شبرغان ښار د سرحدونو، قومونو او قبایلو چارو ریاست په مشرۍ د ټولو قومونو له مشرانو او استازو سره د یووالي، یو بل منلو او د قومونو د هغمږي کولو په موخه ناسته وشوه.
په دغه ناسته کې د یاد ولایت د سرحدونو، قومونو او قبایلو چارو رئیس مولوي غلام نبي صمیم وویل چې د اسلامي امارت په راتګ سره د قومونو ترمنځ د یووالي او ورورګلوي په برخه کې ډېر کار شوی او مېشتو قومونو ته خدمتونو په برخه کې د پام وړ مثبت بدلون راغلی دی. هغه زیاته کړه: لکه څرنګه چې مو شل کاله د اشغال د له منځه وړلو لپاره مبارزه وکړه اوس به د هیواد د بهبود او پرمختګ لپاره چټک ګامونه اخلو.
له بله پلوه بیا غونډې ته راغلیو قومي مشرانو د یاد ریاست له ستړیاوو او هڅو څخه قدرداني وکړه او ویې ویل چې یادو مسؤلینو د قومونو تر منځ د اتفاق، همغږۍ او د دوی د ستونزو هوارولو په برخه کې ډېرې ستړیاوي کړې دي. یادو قومي مشرانو له اسلامي امارت څخه حمایت او ملاتړ اعلان کړ او غونډه د دعائیې په ویلو سره پای ته ورسېده.
