د جلالتماب ولسمشر هغه هدایتونه، چې پرون په ولسمشرۍ ماڼۍ کې د وزارت له مشرتابه سره په غونډه کې شریک شوي و، تعقیب او اړوندو ادارو ته یې د عملی کولو لارښوونه وشوه
په هغې غونډه کې، چې له همدې امله نن سه شنبه د روان کال د غبرګولي د میاشتې په ۱۱مه نېټه د سرحدونو او قبایلو چارو د وزیر محترم محب الله صمیم په مشرۍ او د وزارت د معینانو او رییسانو په ګډون جوړه شوې وه، لومړى مسلکي معین ښاغلي محمد اصف ننګ ټول هدایتونه د غونډې له ګډونوالو سره شریک کړل.
ورپسې د غونډې ګډونوالو د خپلو نظرونو له شریکولو وروسته ددغو هدایتونو د تعقیبولو او عملي کولو په خاطر د وزارت مشرتابه ته ډاډ ورکړ.
په دې غونډه کې ښاغلي صمیم ټینګار وکړ، چې اړوندې ادارې دې د لازمو طرحو په جوړولو سره په دغو برخو کې کار وکړي.
