د ترکيې او افغانستان اړيکې له ۴۰۰۰ کلونو اوړي !
دغه خبره په کابل کې د دوست هېواد ترکیې سفير ددغه هېواد د خپلواکۍ د شپږنويمې کلیزې په هغې لمانځغونډه کې، چې د افغانستان دولتي چارواکو، سیاستوالو، د پارلمان غړو او یو شمېر نارینه او ښځینه مېلمنو هم ګډون کړی و، څرګنده کړه.
دلته د ترکیې سفیر په داسې حال، چې په ترکیه کې د جمهوریت د اعلام په اړه خبرې کولې ورسره جوخت یې د افغانستان او ترکيې تر منځ په تاریخي اړیکو ډېر تمرکز درلود.
ښاغلي سفیر وویل: چې افغانستان د ترک ملک په زړونو کې ځانګړې ځای لري، د ترکيې د خپلواکۍ په اخیستلو کې د افغانانو د سرښندنو تاریخ ۴۰۰۰ زره کلونه په برکې نیسي.
له باکو وروسته افغانستان هغه هېواد و، چې ترکیې په ۱۹۲۵ م کال کې خپله سیاسي نماینده ګې پکې پرانیستله او په ۱۹۲۱ م کې افغانستان لومړی هېواد و، چې د انقرې حکومت یې په رسمیت وپېژندلو. او د اتفاق په نوم یې ورسره تفاهم لیک لاسلیک کړ.
همدا راز په ۱۹۲۸ م کال د علیحضرت امان الله خان لومړني سفر ته، چې ترکیې ته یې د لومړنۍ بهرنۍ پاچا په توګه درلود اشاره وشوه او په تخنیکي برخه کې د یو تفاهم لیک د لاسلیک کولو خبره وکړه. د دواړو هېوادونو په تاریخي پس منظر، اړیکو د ارزښت، د ترکیې هېواد له خوا په بېلابېلو برخو کې د افغانستان سره د تیرو او راتلونکو همکاریو او مرستو په اړه معلومات وړاندې کړل او د همکاریو پر دوام یې ټینګار وکړ.
همدا راز ترکيه په پام کې لري، چې له افغانستان څخه د خپل ملاتړ په دوام په کابل کې د مولانا جلال الدين محمد بلخي په نامه د افغان - ترک ښځينه پوهنتون هم جوړ کړي، چې په دې اړه خبرې روانې دي.
د سرحدونو او قبایلو چارو وزارت هم له افغانستان سره د ترکیې هېواد مرستې او همکارۍ ګټورې بولي او د دواړو هېوادونو ترمنځ په بېلابېلو برخو کې د اړیکو په پراختیا ټینګار کوي او ددغه هېواد له مرستو مننه کوي.
