د تدارکاتو نوي سرپرست رئیس په کار پیل وکړ !
د سرحدونو او قبایلو چارو وزارت د تدارکاتو نوي سرپرست رئیس ښاغلي محمد رسول ظاهري ، چې د وزارت په وړاندیز او د جمهوري ریاست د عالي مقام په منظورۍ د دغه وزارت د تدارکاتو رئیس په توګه ټاکل شوی دی. د یوي غونډې په ترځ کې د وزارت کارکوونکو ته وروپېژندل شواو په کاریې پیل وکړ.
د سرحدونو او قبایلو چارو وزیر ښاغلي محب الله صمیم د معرفي په دې غونډه کې وویل : ښاغلي محمد رسول ظاهري د اقصاد په برخه کې لیسانس او ماستري یې هم کابو بشپړه کړې ده ، د تدارکاتو په برخه کې لس کلنه تجربه لري او یو ژمن او متعهد شخص دی.
ښاغلي صمیم د تدارکاتو برخه ډېره مهمه وبلله، له همدې امله یې په شفافیت او جدي نظارت ټینګار وکړ. ښاغلي ظاهري ته یې د ټاکل کېدوله امله مبارکي وویله، له همکارانو یې وغوښتل، چې همکاري ورسره وکړي.
دغه راز ښاغلي صمیم تېره ورځ د افغانستان اسلامي جمهوریت ولسمشر ته د وزارت د روان مالي کال د فعالیتونو په اړه د رپوټ وړاندې کولو خبرورکړ وې ویل: چې ولسمشر د رپوټ په اورېدو خوښي او رضایت څرګند کړ او دغه راز یې د وزارت لخوا په بېلابېلو برخو کې د کارد بهبود په پاروړاندې شوي وړاندیزونه ومنل. له خپلو همکارانو یې وغوښتل چې خپلې چارې د نافذه قوانینو په رڼا کې په فعال ډول مخ ته یوسي او هغه مسولیتونه چې د خپلو خلکو په وړاندې لري په ښه توګه ترسره کړي.
دغه راز ښاغلي ظاهري هم د هېواد ولسمشر او د سرحدونو او قبایلو چارو وزیر له باور او اعتماد څخه مننه وکړه او د شفافیت په پام کې نیولو سره یې د چارو د ښه ترسره کولو ژمنه وکړه.
