د بدخشان ولایت د کوف اب ولسوالۍ له قومي مشرانو او مخورو سره کتنه
پنچ شنبه، ٢٩ ربيع الثاني ١٤٤٤
د سرحدونو، قومونو او قبایلو چارو سرپرست وزير ښاغلي الحاج ملا نور الله نوري د بدخشان ولايت کوف اب ولسوالي له علماؤ، قومي مشرانو، مخورو او ځوانانو سره د وزارت د غونډو په تالار کې وکتل. په دې کتنه کې تر ښه راغلاست وروسته د راغلو قومي مشرانو او مخورو په استازیتوب محترم مولوي اعظم خواجه، محترم مولوي غلام الله، محترم مولوي عنایت الله، محترم مولوي شبیر احمد او محترم حاجي حفیظ الله کوفی خبرې وکړې، نوموړو په خپلو خبرو کې سیمه ایزې ستونزې له ښاغلي نوري سره شریکې کړې. ورپسې د سرحدونو، قومونو او قبایلو چارو وزارت سرپرست وزير ښاغلي ملانورالله نوري په خپلو خبرو کې د یادو قومي مشرانو ستونزې پر ځای وبللې، هغه زیاته کړه افغانستان د تير شل کلن جهاد په اوږدو کې ستاسو په شان مجاهدو او په دين مينو ولسونو ساتلی. ښاغلي نوري وویل: دسرحدونو، ق.ق چارو وزارت د ولس رسا غږ دی،هڅه مو داده چې ستاسو ستونزو ته دحل لارې پیدا کړو او په راتلونکي کې به ددې ستونزو دحل په موخه د نورو ادارو له استازو سره یو ځای دبدخشان ولايت د ځینو سرحدي ولسواليو حالت له نږدې وڅېړو او ستاسو ستونزې به تر اړوندو ارګانونو ورسوو.
