د بامیانو ولایت د وروستیو تروریستي پېښو ټپیانو د روغتیا پوښتنه وشوه!
د سرحدونو او قبایلو چارو سرپرست او نوماند وزیر ښاغلي محب الله صمیم او ورسره مل پلاوي نن له غرمې مخکې د شهید سردار محمد داوود خان روغتون کې د بامیانو ولایت د وروستیو تروریستي پېښو ټپیانو د روغتیا پوښتنه وکړه.
ښاغلي محب الله صمیم د خپلو خبرو پرمهال د یاد ولایت د تروریستي پېښو شهیدانو ته د لوی خدای ج له سپېڅلي دربار څخه د فردوس جنت او ټپیانو ته د بشپړې روغتیا دعا وکړه وې ویل: دا غم یوازې پرتاسو نه دی، موږ ټول په دې ویر کې درسره شریک یو، هیله مو داده، چې نورو مو په هېواد کې دغه شان پېښې له منځه ولاړې شي او د سولې فضا رامنځته شي.
په مقابل کې یادو ټپیانو د وزارت د مشرتابه له ملي احساس او خواخوږۍ څخه مننه وکړه.
د یادولو وړ دی، چې د سرحدونو او قبایلو چارو وزارت مشرتابه د دغو ټپیانو سره یو اندازه نغدي مرسته هم وکړه.
