د ازبيکي ژبې د ملي ورځې په مناسبت د سرحدونو او قبایلو چارو وزارت پیغام!
ژبه د پوهولو او پوهېدلو د وسېلې په توګه د نړۍ د ټولو انسانانو ترمنځ د اړیکو د ټینګولو، د ژوندانه د اړتیاوو، غوښتنو ، فکر، نظر او تجربو د راکړې ورکړې لپاره لار هواروي او همداراز زموږ په هېواد کې د بېلابېلو قومونو د نږدې والي او یووالي سبب ګرځي.
د ژبو ورځو له لمانځلو مطلب دا وي، چې له یو خوا ویوونکي دا احساس وکړي، چې هم خپله او هم بله ژبه له ارزښت او درنښت ډکه ده او بل دا، چې مسوولو ادارو او هغوی ته، چې کولای شي د ژبې د ودې لپاره کار وکړي، دا وروښيي، چې په خپله ژبه د هېواد خلکو ته د زده کړې زمینه برابره کړي.
د سرحدونو او قبایلو چارو وزارت د ازبیکي ژبې د ملي ورځې په مناسبت د هېواد په دننه او بهر کې ټولو مېشتو هېوادوالو په تېره بیا ازبيک وروڼو او خویندو ته د مبارکۍ ویلو ترڅنګ د هېواد نورو ژبو تر څنګ دې ژبې ته د یو ستر ارزښت په سترګه ګوري او ژمن دی، چې د ازبيکي ژبې د ودې لپاره تر خپلې وسې کار او خدمت وکړي.
درنښت
محب الله صمیم
د سرحدونو او قبایلو چارو سرپرست او نوماند وزير
