دلوګر ولایت دسرحدونو اوقبایلو چارو ریاست کې د بلوڅو او پښتنو د پیوستون ورځ ولمانځل شوه.
:
د لوګر ولایت دبیلابیلو سیمو ګڼو قومي مشرانو، متنفذینو، علماو او ځوانانو د بلوڅو او پښتنو د پیوستون ورځ د يوې جرګۍ په ترڅ کې د لوګر ولایت د سرحدونو او قبایلو چارو ریاست د جرګو په تالار کې ولمانځله.
په دې غونډه کې د لوګر ولایت د سرحدونو اوقبایلو چارو رئيس استاد فضل معبود دانش، ګڼو قومي مشرانو او علماوو ګډون کړی وو،
په لومړي سرکې د سرحدونو او قبایلو چارو رئيس استاد فضل «دانش» قومي مشرانو ته ښه راغلاست ووایه او بیایې د بلوڅو او پښتنو داړیکو دمخینې، تاریخي شالید، دود، ورورګلوۍ، اتحاد، اړیکو او کلتور په اړه هر اړخیزې خبري وکړې، دا ورځ یې یوه ملي ورځ وبلله او د دې ورځې لمانځل یې د ملي روحیې یووالي او اتحاد سمبول یاد کړ، ویې ویل نور قومونه هم زموږ وروڼه قومونه دي، دوی باید داحس نه کړي چې ولې دا ورځ یوازې د پښتنو او بلوڅو قومونو په نوم لمانځل کیږي، د دې علت یې دا یاد کړ، چې یاد قومونه دکرښې دواړو لورو ته پراته دي نو ځکه یې اړیکو ته کتنه کیږي، او ورځ یې په نوم لمانځل کیږي، ده زیاته کړه ټول قومونه چې په ګران هېواد افغانستان کې مېشت دي یو د بل وروڼه دي، اسلام موږ له قومیت او توکم پالنې څخه منع کړې یو!
ورپسې د قومونو په استازیتوب ملک سید رسول احمدزي د دې ورځې په ارزښت خبرې وکړې او یاده یې کړه یووالی او اتحاد د ټولو قومونو ترمنځ ورورګلوي لا قوي کوي او یوبل ته یې نږدې کوي.
ورپسې بل قومي مشر ډاکټر محمد صابر هم هر اړخیزې خبرې وکړې، ټول قومونه یې وروڼه وبلل او د یوالی غږ یې پرې وکړ، ورپسې بل قومي مشر معلم یارمحمد هم دقومونو په یووالي او اتحاد ټینګار وکړ، یاده یې کړه موږ پنځه زره کلن تاریخ لرو، خو د پنځوس کلن تاریخ لرونکو هېوادونو تر اغیز لاندې او اړ یو د دې ستر لامل یې دقومونو ترمینځ بې اتفاقي یاده کړه.
غونډه په دعا پای ته ورسېده
