دجنوب لوېديځې حوزې له قومي مشرانو سره د هېواد د روانو حالاتو او سولې د خبرو اترو په اړه سلامشورې وشوې!
د سرحدونو او قبايلو چارو وزير محترم محمد شفيق ګل آغا شېرزي نن د روان لمريز کال د غبرګولي په 18مه نېټه په کابل کې په خپل مېلمستون کې د جنوب لوېدېځې حوزې له قومي مشرانو، وکيلانو، بانفوذه او مطرحو سياسيونو، مخورو، ټولنيزو فعالانو سره په کتنه کې د هېواد د روانو حالاتو او په راتلونکو بين الافغاني خبرو اترو کې د قومي مشرانو او مخورو د رول په اړه مشورتي غونډه وکړه.
د غونډې په پيل کې د سرحدونو او قبايلو چارو محترم وزير سوله د افغانانو اساسي اړتيا وبلله او د بين الافغاني خبرو اترو د ژر پيلېدو او سولې په ټينګښت کې د قومي مشرانو د رول پر اغېزمنتيا باندې ټينګار وکړ.
د غونډې ټولو ګډونوالو په يوه غږ د سولې او ملي يووالي په ټينګښت کې د ښاغلي شېرزي هلې ځلې وستايلې او ډاډ يې ورکړ، چې په خپل ټول توان او نفوذ سره به په دې برخه کې هاند او هڅه وکړي.
نوموړو دغه راز پر طالبانو هم غږ وکړ، چې له افغان دولت او ملت سره اوربند وکړي او بين الافغاني خبرو اترو ته لبيک ووايي.
