تخار ولایت کې کوچیانو ته د زده کړو د زمینې مساعدولو په موخه ناسته ترسره شوه
یکشنبه ۱۰ / شوال المکرم/ ۱۴۴۴
د تخار ولایت د سرحدونو، قومونو او قبایلو چارو ریاست په همغږۍ د یاد شوي ولایت کوچي قومونو ته د زده کړو د زمینې برابرولو په اړه له پوهنې ریاست سره ناسته ترسره شوه.
په دغه ناسته کې د تخار ولایت د سرحدونو، قومونو او قبایلو چارو رئیس مولوي احمدالله تالقاني، د ریاست همکارانو او یاد ولایت د کوچي قومونو استازو د پوهنې له رئیس مولوي حزب الله مبشر سره وکتل.
د ناستې په پیل کې د کوچي قومونو سرخیلانو د خپلو سیمو د ماشومانو تعلیمي ستونزې یادې کړې او د پوهنې له ریاست څخه یې په خپلو سیمو کې د ښوونځیو، د سواد زده کړې او نورو ټولګیو د جوړولو غوښتنه وکړه.
ورپسې د یاد ولایت د پوهنې رئیس ښاغلي مبشر د سرحدونو، قومونو او قبایلو چارو رئیس او راغلیو کوچي مشرانو ته ډاډ ورکړ چې په یادو شویو سیمو کې به تعلیمي بنسټونو ته پاملرنه کوي او وعده یې وکړه چې په لنډه موده کې به د سواد زده کړې محلي ټولګي پیل کړې.
د ناستې په پای کې سرحدونو، قومونو او قبایلو چارو رئیس د پوهنې ریاست څخه مننه وکړه چې هر ځل یې د تعلیم په برخه کې د دوی غوښتنې منلي دي او د هیواد د بچیانو د پوهې په برخه کې هڅې کوي.
