بلخ کې د دوه کلنې شخړې ترڅنګ جوز جان کې هم مرورې کورنۍ سره پخلا شوې
چهار شنبه ۵ جمادی الآخرة ۱۴۴۷
بلخ ولايت د سرحدونو، قومونو او قبايلو چارو رياست مسؤلينو د قومي مشرانو په همکاري د دغه ولايت په شولګرې ولسوالي کې د ځينو خپلمنځي اختلافاتو له کبله هغه راپورته شوې شخړه حل کړه، چې په ترڅ کې يې يو کس وژل شوی و او درې مختلفې کورنۍ پکې ښکېل وې.
دغه شخړه د تېرو دوه کلونو څخه روانه وه او لوی کورني اختلافات يې رامنځته کړې وو، چې د اسلامي امارت د مشرانو په منځګړيتوب په سوله او ورورولۍ بدله شوه. ښکېلو لورو تر روغې وروسته یو بل وبښل او ژمنه يې وکړه، چې له دې وروسته به د ورورولي لارې غوره کوي.
همداراز د جوزجان ولایت د سرحدونو، قومونو او قبايلو چارو رياست مسؤلينو هم په ورته مهال د دغه ولايت په مرکز کې د دوو کورنيو ترمنځ نږدې د يو کال راهيسې هغه روانه شخړه په سوله ييز ډول هواره کړه، چې لويې بد بينۍ يې رامنځته کړې وې او وخت ناوخت به ښکېلو خواوو په يو بل تورونه پوري کول.
