بغلان ولایت ته د افغانستان د اسلامي امارت د سرحدونو او قبایلو چارو وزارت د سرپرست محترم ملانورالله نوري او ورسره مل پلاوې سفر !
د افغانستان د اسلامي امارت د سرحدونو او قبایلو چارو وزارت سرپرست ښاغلي ملانورالله نوري په داسې حال کې، چې د وزارت مقام د دفتر ریاست سرپرست محترم شیخ حضرت ولي حقاني او د اطلاعاتو او عامه اړيکو رئيس هم ورسره مل وو، نن له غرمې مخکې د روان ۱۴۰۰ کال د تلې میاشتې په ۳۰مه نېټه بغلان ته د خپل رسمي سفر په لومړۍ ورځ ددغه ولايت د مرکز او بېلابېلو ولسواليو له يو شمېر قومي مشرانو، ديني عالمانو او ځوانانو سره ډ پلخمري ښار د ولايتي شورا د کنفرانسونو په تالار کې وکتل او په مختلفو برخو کي يې د هغوی ستونزې واوريدې.
په دې کتنه کې لومړی د بغلان ولايت د سرحدونو او قبایلو چارو آمر ښاغلي عبدالقهار قانع، ښاغلي نوري او مل پلاوي ته ښه راغلاست ووايه او د غونډی اهداف او اجندا يې بيان کړه.
ورپسې څو تنو قومي مشرانو او مخورو د نورو په استازيتوب خبرې وکړې او بغلان ته يې د سرحدونو او قبایلو چارو وزير او مل پلاوي سفر له ارزښته ډک وباله.
نوموړو له اسلامي نظام څخه د ملاتړ څرګندولو په ترڅ کې خپلې يو یو لړ سيمه ييزې ستونزې د حل په موخه ورسره شریکې کړي.
ورپسې دسرحدونو او قبایلو چارو وزارت سرپرست ښاغلي ملا نورالله نوري په خپلو خبرو کې بغلان ولايت ته د خپل رسمي سفر په اړه رڼا واچوله زياته يې کړه: خوشاله يم چې نن د بغلان له هغه زړور او مجاهد ملت سره، چې د اشغال په پاې ته رسولو او افغانستان د ازادۍ په ترلاسه کولو کې يې مجاهدت او په دې لار کې يې بې شمېره قربانۍ ورکړي دي، له نږدې ګورم او ستونزې يې اورم.
ښاغلي نوري دغه راز نوموړو ته ډاډ ورکړ، چې ستونزې به یې د وزارت د شته امکاناتو په چوکاټ کې حل کړي.
د سرحدونو او قبایلو چارو وزارت د خپلو خبرو په دوام وويل: افغانان خپلو اساسي موخو ته، چې هغه له اشغال څخه د افغانستان خلاصول او په پایله کې یې د اسلامي نظام ټينګښت و، چې په دې کې ټولو هېوادوالو ونډه اخيستې او پر دغه بريا ټول افغانان وغواړي.
وروسته د وزارت د مقام ددفتر رييس محترم شیخ حضرت ولي حقاني خبرې وکړې زياته يې کړه: الله پاک پر موږ او تاسو لويه پېرزوينه او لورينه کړې، چې په خپل نصرت سره يې زموږ په هېواد کې اسلامي نظام ټينګ کړ، اوس پر موږ ده، چې ددغه عظيم نعمت کفران ونه کړو، شکر وباسو او د خپل اسلامي او شرعي نظام ساتنه او پالنه وکړو.
