بدخشان کې د پامير لېسې د کمپليکس ودانیزو چارو د څرنګوالي په اړه غونډه
یک شنبه ٢٥ شوال المکرم ۱۴۴۷
د سرحدونو، قومونو او قبايلو چارو وزارت له لوري ټاکل شوي پلاوي او د قرغيزستان هيواد سفير صديقوف کاردقون او ورسره مل هیئت بدخشان ولايت کې د پامیر لېسې کمپلکس جوړولو په موخه سفر کړی او هلته یې د بدخشان له والي الحاج مولوي محمد اسماعيل غزنوي سره د کتنې پرمهال د یادې لېسې د رغنیزو چارو په هکله د یوې ناستې په ترڅ کې خبرې کړي.
په دغه ناسته کې د قرغیزستان سفیر ښاغلي کاردقون د خپل هیواد د ولسمشر نېکې هیلې او درناوی څرګند کړ، ويې ويل، چې د ولسمشر په ځانګړي حکم یې بدخشان ولایت ته له تخنیکي پلاوي سره یوځای سفر کړی، ترڅو د پامیر لېسې جوړولو په اړه له اړوندو مسؤلينو سره سلامشورې وکړې.
قرغیستاني پلاوي د پامیرلېسې د کمپلکس په جوړولو کې همکاري او ملاتړ د خپل هیواد حسن نیت، د دواړو هیوادونو ترمنځ د دوستانه اړیکو پراختیا او د ښه ګاونډیتوب یوه ښکاره بېلګه وبلله.
د سرحدونو، قومونو او قبایلو چارو وزارت له لوري لېږل شوي پلاوي د بدخشان ولایت د اړوند ادارو د تخنیکي استازو په ملتیا له یاد هیئت سره مشورتي ناسته وکړه او د یاد کمپلکس د جوړېدلو سیمه یې له نږدې وکتله چې ستندردونو ته په کتو به یې عملي چاري په نږدې راتلونکې کې پیل شي.
هېره دي نه وي، له فتحې وروسته د سرحدونو، قومونو او قبایلو چارو وزارت مشرتابه د بدخشان ولایت سرحدي ولسوالیو ته سفر وکړ، د یادو ولسونو لومړنۍ ستونزې یې په نښه کړې او له اړوند وزارتونو سره په همغږي یې یادو ستونزو ته رسېدنه وکړه، چې په دغه لړ کې، یادو ولسونو ته د پېژندپاڼو وېش، د مخابراتي شبکو فعالېدل، د پامیر سرک رغول، د پامیر ولسوالۍ منظورېدل، د پامیر لېسې ایجاد او د ځینو نورو پروژو تظبیق، د یادونې وړ دي.
