بادغيس کې دوه قومونه له ۳۰ کلنې دُښمنۍ ورسته سره پخلا شول
دوشنبه ۱۴۴۶/۷/۱۹
د بادغيس ولايت بالا مرغاب او غور ماچ ولسواليو کې د موسی زي او اڅکزي قومونو ترمنځ شاو خوا دېرش کلنه دُښمني په سوله ييز ډول حل او دواړه قومونه د ورورۍ په ټغر راټول شول.
په دغه شخړه کې چې له امله یې څو تنه ټپيان شوی وو او يو له بل سره يې د لسګونه څارويو د برمتې پر سر لا هم ژور جنجالونه موجود وو، د ياد ولايت د سرحدونو، قومونو او قبايلو چارو رياست مسؤلينو، قومي مشرانو، علماء کرامو او ځايې اوسېدونکو د هڅو په پایله کې د یوې مرکې په ترڅ کې روغې جوړې ته راوبلل شول.
د روغې جوړې په ناسته کې لومړی له دواړو خواوو څخه اختیار خطونه واخیستل شول او وروسته یې په اړه د خېر فيصله وشوه چې د فیصلې په اړه دواړو لوریو رضایت وښود او سره غاړه غړۍ شول. دوی د پرېکړې له منلو وروسته د اسلامي امارت له مشرانو مننه وکړه ویې ویل: موږ ژمن یو، چې تردې وروسته به يوبل ته هېڅ خنډونه نه جوړوو او یو له بل سره به د وروڼو په څېر ژوند کوو.
