افغانستان له هرڅه نه مخکې سولې، ملي یووالي او سیاسي ثبات ته اړتیا لري!
دغه څرګندونې د سرحدونو او قبایلو چارو سرپرست او نوماند وزیر ښاغلي محب الله صمیم نن دوشنبې د روان لمریز کال د تلې میاشتې پر ۲۸ مه نېټه د مشرانو جرګې له غړي ښاغلي غلام عباس اخلاقي، د افغانستان د جمهوریت غوښتونکو ګوند له مشرې اغلې عادلې بهرام، قومي مشرانو او یو شمېر ځوانانو سره د کتنې په ترڅ کې وکړې.
په دې کتنه کې راغلو مشرانو د خپلو سیمه ییزو ستونزو شریکولو ترڅنګ د سولې، ملي یووالي د ټینګښت، د نظام او ملي امنیتي او دفاعي ځواکونو څخه د ملاتړ، د ناامنو سیمو ځوانانو ته د زده کړې د زمینې برابرولو او د قومونو د انسجام په برخه کې د سرحدونو او قبایلو چارو وزارت د مشرتابه هلې ځلې وستایلې او د خپلو همکاریو ډاډ یې ورکړ.
ورپسې ښاغلي محب الله صمیم په خپلو خبرو کې سوله، ملي یووالی او سیاسي ثبات د هېواد اساسي اړتیا وبلله او راغلو مشرانو ته یې ډاډ ورکړ، چې ستونزې به یې د وزارت د امکاناتو په چوکاټ کې حل کړي.