اسلامي نظام ثبات، ولسونو د يووالي او انسجام ناستو په ترڅ کې نن په پکتيکا ولايت کې غونډه وشوه
سه شنبه ۱۲/۴/۱۴۴۶
د سرحدونو، قومونو او قبایلو چارو وزارت د ګډ پلاوي په ملتيا د ياد وزارت د جرګو او قبايلو چارو د همغږۍ معين الحاج مولوي محمد علي جان احمد، د جرګو او قبایلي چارو د همغږۍ رئيس مولوي نيک محمد افغاني، مل پلاوي، د پکتيکا والي الحاج ملا عبدالخالق عابد، علماوو او قومي مشرانو ګډون کړی وو. د اطلاعاتو او عامه اړيکو رئيس ښاغلي حقاني د پيل په وينا کې د اسلامي امارت د خدمتونو يادونه وکړه ويې ويل: د امارت له راتګ سره سم د پکتيکا مرکز ښرنې په شمول ۱۴ ولسواليو کې ۱۵ ښوونځي جوړ شوي. هغه زياته کړه نن بيا هم هڅه کوو چې د دغې غونډې له لارې د ولس لومړنۍ ستونزې واورو او د حل په موخه يې هلې ځلې وکړو.
ورپسي د جرګو او قبايلو چارو د همغږۍ معين الحاج مولوي محمد علي جان احمد په خپلو خبرو کې د پکتيکا ولايت ولسونه قهرمان خلک ياد کړل د هغوی ميړانې يې وستايلې او ويې ويل: د دې ولايت خلکو ته د تيرو حکومتونو له لوري هيڅ ډول خدمت ندى شوى بلکې د دښمن په سترګه ورته کتل شوي. نوموړي زياته کړه: موږ ډاډ درکوو چې د اسلامي نظام مسؤلينو ته اوس ستاسو ټولې ستونزې ور معلومي دي. هغوى دې ته ژمن دي چې د مجاهد ولس د خدمت لپار هره شونې لار ولټوي. ښاغلي احمد له ولسونو وغوښتل چې د دښمن په تبليغاتو و نه غوليږي، حقايق درک کړي، متحد شي او د خپل نظام او خاوري په ساتلو کې ونډه واخلي.
د غه راز د جرګو او قبایلي چارو د همغږۍ رئيس مولوي نيک محمد افغاني وويل: د اسلامي امارت مسولين هڅه کوي ترڅو د ولسونو ستونزې حل کړي او د دې کار لپاره يې مختلفو ادارو ته کارونه سپارلي، ښه مثال يې د سرحدونو، قومونواوقبايلو چارو وزارت دی، چې، د قومونو ترمنځ د اتحاد او يووالي ترڅنګ د شخړو حل ته جدې پاملرنه کوي او تاسو يې شاهدان ياست چې په تېرو کلونو کې زرګونه منازعي حل کړي دي.
قومي مشرانو د خپلو خبرو په ترڅ کې د اسلامي امارت د کلک ملاتړ ترڅنګ وويل: د نظام او خلکو ترمنځ د داسي ولسي غونډو برابرول په دې دلالت کوي، چې د حکومت او ولس ترمنځ فاصلې نشته، عدل دی، امنيت دی او په پوره صداقت سره د ولسونو خدمت کيږي. دوی زياته کړه موږ د ا.ا.ا تر څنګ ولاړ يو حمايت يې کوو، په پوره اتحاد او اتفاق يې دفاع کوو او پرې به نږدو چې دښمن پري برلاسى شي.
