((هغه کسان چې له افغانستانه وتلي دي، اسلامي امارت هیڅ ستونزه نه ورسره لري))

چهارشنبه ۱۷ ربيع الآخر ۱۴۴۸

د سرحدونو، قومونو او قبایلو چارو وزیر ملا نورالله نوري نن له غرمې وړاندې په پلازمينه کابل کې د ختيځو او سويل ختيځو ولايتونو له کوچي سرخيلانو سره په جوړه شوې غونډه کې وویل: هغه کسان چې له افغانستانه وتلي دي اسلامي امارت ورسره هېڅ ستونزه نه لري او کولای شي بېرته هېواد ته راستانه شي، خو باید د بل چا په لمسون د هېواد د خرابولو هڅه ونه کړي. نوموړي يادو مخالفينو ته په خطاب کې زياته کړه، که کومه ستونزه لرې، راشه مخامخ راته ووایه ځکه موږ امریکایان د خبرو مېز ته مجبور کړل او د تفاهم ښه ژبه هم لرو. هغه زیاته کړه، تاریخ ثابته کړې، چې په افغانستان کې د پردیو په مرسته رامنځته شوي حرکتونه او راغلي کسان پایښت نه شي کولای، نو له هېواده بهر مېشت کسان دې خپلې ستونزې د خبرو او تفاهم له لارې مطرح او حل کړي او د افغانستان پاکه خاوره دې د پردیو د موخو لپاره نه کاروي.

ښاغلي نوري د خپلو خبرو په پای کې د خپل پيغام په شکل ګاونډي هېواد ته وويل، پاکستان دې د افغانستان تاریخ، مېړانه او سیاسي تجربې مطالعه کړي او د افغانانو صبر او زغم دې نه ازمايې. نوموړي زياته کړه اسلامي امارت د اسلامي اصولو له مخې له ټولو هېوادونو سره د ښو روابطو غوښتونکی دی، خو که د افغانستان خلکو او مجاهدینو ته اجازه ورکړل شي، په ټل کې به بیرغ درته ودروي.

غونډې ته د ياد وزارت د کوچيانو چارو د سمون لوی رئيس ملا محمد بصر صاحبزاده کوچيان د هېواد يو مهم قشر وباله او ويې ويل: موږ له مشرتابه سره په مشوره کوچي سرخيلان دې غونډې ته رابللي ترڅو ستونزې يې واورو او د خپلو امکاناتو په صورت کې د حل لارې چارې ورته برابرې کړو

کوچي سرخېلانو او قومي مشرانو په خپلو خبرو کې د اسلامي نظام د ملاتړ، همغږۍ او پیاوړتیا لپاره ډاډ څرګند کړ او ویې ویل، چې د هېواد د ثبات او پرمختګ لپاره به هروخت له نظام سره خپلې همکارۍ ته دوام ورکوي. يادو مشرانو په ورته وخت کې د کوچي ولس یو شمېر ستونزې او وړانديزونه هم شريک کړل، چې پکې د استوګنې، څړځایونو، تعلیم، روغتیا او نورو اساسي خدمتونه شامل وو.

دغه غونډه د سرحدونو، قومونو او قبایلو چارو وزارت اړوند د کوچیانو چارو د سمون لوی ریاست په مشري د  ننګرهار، کنړ، لغمان، خوست، پکتيا او پکتيکا ولایتونو د کوچي سرخيلانو، قومي مشرانو، علماوو او مخورو سره د همغږۍ په موخه برابره شوې وه، چې په دعايه سره پای ته ورسېده.