کنړ کې د ۲۲ کلنې دښمني سر بېره نورستان کې هم د مسؤلينو له لوري شخړه حل شوه
يکشنبه ۲۳ ربيع الأول ۱۴۴۸
د کنړ ولايت د سرحدونو، قومونو او قبايلو چارو رياست د مسؤلينو له لوري د ياد ولايت په شلتن ولسوالي کې د کروندو پر سر د دوو کورنيو ترمنځ راپورته شوې دښمني داسې مهال هواره شوه، چې د سيمې د علماء کرامو، قومي مخورو او عامو خلکو په ګډون د اسلامي امارت يو شمير مشرانو حضور درلود.
ياده دښمني چې څه باندې دوه لسېزې يې دوام درلود د ګڼو اختلافاتو ترڅنګ پکې دوو تنو خپل ژوند له لاسه ورکړی وو او همداراز د لويو مالي تاوانونو سربېره ښکېلو خواوو لاهم يو بل ته مرګوني ګواښونه کول، چې مسؤلينو د خپل منځګړيتوب په پايله کې د سولې په ټغر سره کېنول.
همداراز د نورستان لايت د سرحدونو، قومونو او قبایلو چارو رياست د رئيس په مشري د ديني عالمانو او قومي مشرانو په هلوځلو د دغه ولايت په منډول ولسوالي کې د دوو کورنيو ترمنځ د يو لړ حقوقي مسائلو پر سر پېښه شوې شخړه هواره او ښکېل لوري سره پخلا کړل شول.
د دې رامنځته شوې شخړې په پايله کې يو کس خپل ژوند بايللی و او د ګڼو کورنيو ستونزو ترڅنګ دواړو لوريو ته لوی مالي تاوانونه هم رسېدلي وو، چې ترمنځ يې ژور اختلافات راپارولي وو.
