په بلخ ولایت کې رامنځته شوې شخړه پای ته ورسېده
دوشنبه/ ۱۳/ جمادی الاولی/ ۱۴۴۸
د بلخ ولایت مرکز اړوند د افتخار بلخ کلي د دوو اوسېدونکو ترمنځ هغه شخړه، چې د ترافیکي پېښې له امله رامنځته شوې وه او په ترڅ کې یې یو تن خپل ژوند له لاسه ورکړی و، د یاد ولایت د سرحدونو، قومونو او قبایلو چارو ریاست د رئیس مولوي سردار محمد محمدي په دوامداره هڅو او د قومي مشرانو او مخورو سپین ږیرو په همکارۍ او منځګړیتوب حل او په دوستۍ بدله شوه.
د یادې شخړې د حل په موخه جوړه شوې غونډه کې علماوو، مصلحینو د بښنې او خپلمنځي ورورولۍ په اړه خبرې وکړې هغوی له دواړو لوریو وغوښتل چې د بښنې او تفاهم له لارې ستونزه حل او د راتلونکو اختلافاتو مخه ونیسي. د جرګې له لوري د عادلانه پرېکړې تر کېدو وروسته، دواړو لوریو پرېکړه ومنله او د روغې جوړې هوکړې ته ورسېدل.
د غونډې په پای کې دواړو لوریو ژمنه وکړه چې په راتلونکي کې له یو بل سره هیڅ دول ستونزه نه لري هغوی همداراز د شخړو د سوله ییز حل، د قومي یووالي د پیاوړتیا او د خلکو ترمنځ د ورورولۍ او تفاهم د ټینګښت په برخه کې د سرحدونو، قومونو او قبایلو چارو ریاست د مسؤلینو، قومي مشرانو او مخورو هڅې ارزښتناکې وبللې.
