په خوست کې د دووکورنیو ترمنځ ۱۶ کلنه دوښمني په دوستۍ بدله شوه
سه شنبه، ۲۳ ذوالحجة ۱۴۴۷ هـ قـ
د خوست ولایت مرکز متون په خالصې کلي کې د دوو کورنیو ترمنځ هغه ۱۶ کلنه دوښمني، چې له امله یې یو تن وژل شوی او یو بل ټپي شوی و، د قومي مشرانو، علماوو، مصلحینو او د یاد ولایت د سرحدونو، قومونو او قبایلو چارو رئیس مولوي میا محمد ولي صدیقي په هڅو په دوستۍ بدله شوه.
مولوي میا محمد ولي صدیقي وویل، له هغه وخت راهیسې چې فتحه راغلي او د سرحدونو، قومونو او قبایلو چارو وزارت ته د قومونو ترمنځ د رامنځته شویو شخړو او تربګنیو د مخنیوي مسؤولیت ورکړل شوی، په دې برخه کې په ټول افغانستان کې په پراخه کچه هڅې روانې دي، تر څو ټول ولسونه پر یو ټغر راټول شي. نوموړي همداراز د خپلو خبرو په جریان کې یادو دښمنو کورنیو ته، چې سخت سره خوابدې وې، توصیې وکړي او دوی یې دې ته راضي کړل چې روغه سره وکړي.
په پای کې د مصلحینو له لوري د یادې شخړې د حل په موخه پرېکړه وشوه، چې دواړو کورنیو ومنله او په خپل منځ کې یې د دوستۍ نوی پړاو یې پیل کړ.
