د کندهار او زابل ولايت اړوند د ډيورنډ فرضي کرښې بررسي او څېړنه ترسره شوه
شنبه ۱۸ ربيع الثاني ۱۴۴۷
د سرحدونو، قومونو او قبایلو چارو وزارت د سرحدي څېړنو رئیس مفتي فیض محمد فیضي د يوه ګډ پلاوي په ملتیا د ۱۴۰۴ هـ ل کال له کلني پلان سره سم د کندهار ولایت اړوند فرضي کرښې ته څېرمه پنځو ولسوالیو او د زابل ولايت شملزو ولسوالۍ ته سفر وکړ، چې موخه يې د ډېورنډ فرضي کرښې څېړنه او بررسي وه.
یاد پلاوي لومړی د کندهار سپین بولدک، شورابک، ریګستان، ارغستان او معروف ولسواليو او بيا وروسته د زابل ولايت شملزو ولسوالي ته سفر وکړ چې پرمهال یې له سیمه ييزو مسؤلینو، قومي مشرانو او فرضي کرښې ته څېرمه پرتو خلکو سره ناستې وکړې. دغه هیئت د ناستو په ترڅ کې د فرضي کرښې په شاو خوا ساحو کې د شته ستونزو په اړه معلومات ترلاسه کړل او ډاډ یې وړاندې کړ، چې د حل لپاره به يې اړوندارګانونه په جریان کې کړي.
د دغه سفر په ترڅ کې د کندهار په پنځو ولسواليو کې (۵۸۲.۰۳۵) کيلو متره او د زابل په شملزو ولسوالۍ کې (٩٢.٢١٧) کیلومتره بررسي او پلټنه ترسره شوه، چې په مجموعي توګه (٦٧٤.٢٥٢) کیلومتره تثبيت شوه.
