ننګرهار کې ۱۱ کلنه دښمني په دوستي بدله شوه
پنجشنبه ۱۱ ربيع الأول ۱۴۴۷
د ننګرهار ولایت دره نور ولسوالي په ستن سیمه کې د کورنیو جنجالونو له امله رامنځته شوې شاوخوا ۱۱ کلنه اوږده دښمني، چې دواړو لوريو ته پکې درانه مالي تاوانونه اوښتي وو په سوله او ورورولي بدله شوه.
دغه روغه جوړه د هغې ځانګړې غونډې په ترڅ کې ترسره شوه، چې پکې د ننګرهار ولایت د سرحدونو، قومونو او قبايلو چارو ریاست مسؤلینو د منځګړيتوب رول ادا کړ او د قومي مشرانو، دیني عالمانو او د سیمې مخورو په شتون کې يې ښکېل اړخونه سره غاړه غړۍ کړل.
د شخړې ښکېلو لورو د اسلامي امارت له هڅو مننه وکړه او ژمنه یې وکړه چې راتلونکې کې به د سولې، یووالي او ورورولي په فضا کې ژوند کوي.
