کنړ کې ۱۶ کلنه او بلخ کې ۱۴ کلنه شخړه حل شوه

شنبه ۲۹ صفرالمظفر ۱۴۴۷ د بلخ ولايت د سرحدونو، قومونو او قبايلوو چارو رياست مسؤلينو د ولايتي ادارې استازو، قومي مشرانو او ديني عالمانو په همکاري د دغه ولايت په دولت آباد ولسوالي کې د دوو کورنيو ترمنځ هغه ۱۴ کلنه دښمني پای ته ورسوله، چې له يوه لوري پکې يو کس وژل شوی و او لوی مشکلات يې پېښ کړي وو. همداراز د ياد ولايت په چهار بولک ولسوالۍ کې هم ورته پېښه شوې شخړه، چې يو کس پکې وژل شوی و او د شاوخوا دوه کلونو يې دښمني دوام درلود، د مسؤلينو له لوري حل او طرفينو د خوشحالي غاړې سره ورکړې. په ورته مهال د کنړ ولايت په سرکاڼو ولسوالي کې هم د ځمکې د ملکيت پر سر راپورته شوې ۱۶ کلنه بدي د دغه ولايت د سرحدونو، قومونو او قبايلو چارو رياست مشرانو لخوا داسې مهال هواره شوه، چې د اسلامي امارت منسوبينو، د سيمې مخورو، علماوو او عامو خلکو حضور درلود. مسؤلينو د يادو شخړو د هواري پرمهال ولسونو ته د اميرالمؤمنين حفظه الله د هغه هدايت يادونه وکړه، چې په وينا يې د قومونو تر منځ اختلافات او شخړې له منځه یوسئ، د قومونو ترمنځ یووالی او ورورولي منځ ته راولئ او د دې کړېدلي ولس د قربانيو په بدل کې د هغوی خدمت وکړئ.