په نمیروز او بلخ ولایت کې د محلي مسؤلینو په ستړیا دوه شخړې او په دوستۍ بدلې شوې
دوشنبه ۶/۷/۱۴۴۶
د نمیروز ولایت په مرکز زرنج ښار کې د سرحدونو، قومونو او قبایلو چارو ریاست، دیني عالمانو او سیمه ییزو متنفذینو په منځګړیتوب او هڅو د زرنج ښار د توجک کلي د دوو کورنیو تر منځ لس کلنه دُښمني چې له کبله یې یو تن وژل شوی و او د دواړو کورنیو ترمنځ یې خورا زیات خنډونه رامنځته کړي وو حل او د یوې پراخي ولسي غونډې پرمهال په دوستي بدله شوه.
همدارنګه تېره ورځ د بلخ ولایت د سرحدونو، قومونو او قبایلو چارو د ریاست، قومي مشرانو او مصلحینو په همکاري هم د یاد ولایت د چمتال ولسوالۍ د یوې کورنۍ او د جوزجان د آقچې ولسوالۍ د بلې کورنۍ ترمنځ پېښه شوې شخړه چې دواړه خواوې یې له کبله له ډېرو ستونزو سره مخ وې، یو له بل سره یې روغه وکړه او د دوستي په ټغر را ټول شول.
دا په داسې حال کې ده چې د اسلامي امارت له راتګ سره سم د سرحدونو، قومونو او قبایلو چارو وزارت لوړ مشرتابه او محلي مسؤلین هڅه کوي ترڅو د خلکو ترمنځ د تېرو کلونو پيښې شوې شخړې، خپل منځي دُښمنۍ او بدۍ حل کړي او له دې لارې د ولسونو ترمنځ اتفاق او یووالی لا نور هم پیاوړی کړي.
