په کندوز ولایت کې ۱۰ کلنه بدي په ورورۍ بدله شوه
سه شنبه ۱۴۴۶/۵/۳
د کندوز ولایت د مرکز په جرګذر ناصري کلي کې د دوو کورنیو ترمنځ ۱۰ کلنه خپلمنځي بدي چې په زیاتو مالي زیانونو سربېره له دواړو خواوو څخه پکې ۴ تنه هم وژل شوي وو تېره ورځ د یوې پراخې ولسي ناستې په ترڅ کې په ورورۍ بدله شوه.
د دغې بدۍ د حل په موخه د سرحدونو، قومونو او قبایلو چارو وزارت د دعوت او ارشاد د رئیس مفتي شفیع الله ثاقب په مشري یو پلاوی چې د دغه وزارت د شخړو د حل سلاکار مولوي محمدآجان رهبر هم پکې شامل و، له ولایتي مسؤلینو، قومي مشرانو او د سرحدونو، قومونو او قبایلو چارو رئیس مولوي احسان الله ثاقب سره په ګډه یادې شخړې ته د پای ټکی کېښود.
د دغې شخړې د حل پر مهال مسؤلینو د قومي مشرانو او سیمه ییزو متنفذینو په همکاري په بدۍ کې له ښکېلو لوریو سره ناستې وکړې، د اسلامي شریعت پر بناء یې د دوښمنیو بدې پایلې روښانه کړې او د دودیزو مرکو له لارې یې د دوی تر منځ د خیر پرېکړه وکړه.
