په بغلان ولايت کې د اسلامي نظام ثبات، د ولسونو د یووالي او انسجام ترعنوان لاندې لويه ولسي ناسته ترسره شوه!
سه شنبه ۲۱/۳/۱۴۴۶
په دغه لويه ولسي ناسته کې د ياد ولايت والي الحاج مولوي عبدالرحمن، د سرحدونو، قومونو چارو وزارت د جرګو او همغږۍ رئيس شيخ حضرت ولي حقاني، د جرګو او قبايلو چارو د همغږي معين الحاج مولوي محمد علي جان احمد، د اطلاعاتو او عامه اړيکو رئيس مفتي تسليم الله حقاني، د نازعاتو د حل مشاور مولوي محمد آجان رهبر قومي مشرانو او د رسنيو مسؤلينو برخه اخيستي وه.
قومي مخورو د اسلامي امارت په راتګ خوښي څرګنده کړه، د دې نظام کلک ملاتړ يې و کړ او ويې ويل: خوښ دې، چې افغان خاوره يوځل بيا د خپلو اصلي بچيانو لاس ته ورغلې ده ، ورځ په ورځ پرمختګونه دي او ژر ده، چې افغانستان د نړۍ سيال شي، دوئ د امنيت، سوله ييز ژوند او غښتلي نظام په شتون د الله شکر ادا کړ او غوښتنه يې وکړه چې ولسونو ته دې لا نور کار هم وشي.
د سرحدونو، قومونو او قبايلو چارو وزارت د جرګو او همغږۍ رئيس شيخ حضرت ولي حقاني له ولسونو مننه وکړه، چې د اسلامي نظام په قايميدو يې قربانۍ ورکړې هغه وويل: اوس په افغانستان کې اسلامي نظام دی، لکه څرنګه مو چې په لويو سرښندنو تر لاسه کړی همداسي به يې په سر، مال او د بچيو په قربانيو ساتنه کوو. هغه زياته کړه افغانانو چې هر وخت لاسونه سره يو کړي د نړې زبر ځواکونه او طاقتونه يې مات کړي دي.
د جرګو او قبايلو چارو د همغږۍ معين الحاج مولوي محمد علي جان احمد د دغه ولسي لويې غونډې ګډونوالو ته ورياده کړه، چې ننۍ خپلواکې، واحده رهبرې او منظمه حکومتولې زمونږ د تنکيو شهيدانو د وينو ثمره، د ولسونو د اتحاد او اتفاق برکت دی، نوځکه د حکومتولۍ ټولې چارې هم پخپله سمبالوو. ښاغلي احمد زياته کړه، د اشغالگرو پر وړاندې د افغان ولس جهاد هدف د اسلامي نظام راتلل وو او لله الحمد هغه نظام دغه دې راغی، د ټولې نړۍ خلکو ترې عبرت واخيست چې عزت، حريت ، او آزادي د قربانيو نه بغير نا ممکنه ده.
د سرحدونو، قومونو او قبايلو چارو وزارت، د ولسونو د يووالي او اسلامي نظام د ثبات په موخه په بيلا بيلو ولايتونو کې دې ته ورته د همغږۍ او انسجام غونډې ترتيبوي تر څو د ولس او حکومت تر منځ فاصلې لا نورې هم رالنډې کړي.
