په هیواد کې د غصب شویو ځمکو او څړځایونو د تفکیک او ثبیت په موخه هلې ځلې!
د سرحدي پلټنو معین الحاج مولوي محمد اسماعیل غزنوي د غصب د مخنیوي او استرداد کمیسیون په رأس کې د یوه لوړ رتبه هیئت په مشرۍ فاریاب ولایت ته د خپل سفر پرمهال وویل چې د تېرو څو لسیزو په ترڅ کې هغه څړځایونه او پراخې دښتې چې په کرنیزو ځمکو او استوګنځایونو بدل شوي د تفکیک او تثبیت پروسه یې په چټکۍ سره روانه ده. نوموړي دغه څرګندونې په داسي حال کې ترسره کړې، چې د اسلامي امارت د مشرتابه له پرېکړې سره سم د حکومت د پالیسي مطابق د یوې ټاکل شوې کړنلارې په نظر کې نیولو سره، یاد کمیسیون ته دنده سپارل شوې وه چې، د عامه ځمکو د خوندیتوب او غصب شویو ځمکو د بېرته استرداد په موخه د هېواد د شمالي ولایتونوکې د څړځایونو د سروې او تثبیت پروسه پیل کړي. د دغه پلاوي مشر ښاغلي غزنوي د کرنې اوبو لګولو او مالداري وزارت د استازي او تخنیکي هیئت په ملتیا د فاریاب ولایت له والي او نورو مسؤلینو سره د کتنې پرمهال د دغې بهیر په اړه مفصل معلومات شریک کړل او د دغې پروسې په اهمیت یې هراړخیزې خبرې وکړې. یاد پلاوي د محلي مسؤلینو په ګډون خپل کارونه پیل کړل چې څو ورځو په ترڅ کې یې د هیئت مشرانو مستقیمه رهبري کوله او تخنیکي ټیمونو ته یې د عملي چارو د تنظیم په موخه لازمې سپارښتنې کولې. دغه پلاوي د خپل کار له پیل څخه تراوسه د فاریاب د ۹ ولسوالیو ځمکې تفکیک او تثبیت کړې دي او د پاتې نورو ولسوالیو کارونه په ترتیب سره جریان لري. د یادونې وړ ده، چې دا بهیر به د هیواد په نورو ولایتونو کې هم پیل شي.
