په تخار کې د نظام او ولس ترمنځ د اړیکو نږدېوالي په موخه غونډه
چهارشنبه ـ ۱۱/۱/۱۴۴۶
د تخار ولایت د سرحدونو، قومونو او قبایلو چارو رئیس مولوي احمدالله تالقاني په مرکز تالقان کې د ولسونو د همغږۍ، د نظام او ولس ترمنځ د اړیکو د نږدېووالي او د ولسي ستونزو اورېدلو په موخه د مرکز تالقان او ګڼو نورو سیمو له قومي مخورو سره ناسته وکړه. د دغې غونډې په ترڅ کې قومي سپین ږیرو په افغانستان کې سرتاسري امن او سوکالي د الله تعالی یو نعمت یاد کړ او ولسي اتحاد، بیا رغونې او پراختیا په برخه کې یې د اسلامي امارت د ترسره کړیو خدمتونو ستاینه وکړه. دوی په خپلو سیمو کې د شته ستونزو په برخه کې د حکومت د پام غوښتنه وکړه. د سرحدونو، قومونو او قبایلو چارو رئیس ښاغلي تالقاني د ولسونو حمایت د نظام د بقاء تضمین کوونکی وباله او یاد ریاست یې د خلکو ستونزو اورېدلو مرجع وبلله. نوموړي د هیواد ښېرازي د قومونو په یووالي کې وګڼله او د ولسي ستونزو د هواري ډاډ یې وړاندې کړ.
