د بامیان له والي سره ناسته
سه شنبه ـ ۲۵/۱۲/۱۴۴۵
د سرحدونو، قومونو او قبایلو چارو وزارت اړوند د جرګو او قبایلو چارو د همغږۍ مرستیال مولوي محمد علي جان احمد د یوه پلاوي په مشرۍ بامیان ولایت ته د خپل رسمي سفر په ترڅ کې د یاد ولایت له والي مولوي عبدالله سرحدي سره په دې ولایت کې د یوې سترې ولسي غونډې د جوړېدو په اړه وکتل.
د ناستې پر مهال ښاغلي سرحدي میلمه پلاوي ته د هر اړخیزې همکارۍ ډاډ ورکړ او په دغه ولایت کې یې له ولسونو سره د جوړېدونکې غونډې د څرنګوالي، ترتیب او تنظیم په اړه سلا و مشورې وکړې.
په دې مشورتي ناسته کې د سرحدونو، قومونو او قبایلو چارو وزارت د جرګو او قبایلي چارو د همغږۍ د مرستیال ښاغلي احمد په شمول د وزارت د جرګو رئیس شیخ حضرت ولي حقاني، د څړځایونو او اقتصادي چارو رئیس مفتي لعل محمد منیب او مل پلاوي هم حضور درلود.
