په بغلان کې سېلاب ځپلو ته د مرستو انتقال
۱۰/۱۱/۱۴۴۵
د سرحدونو، قومونو او قبایلو چارو وزارت یوه پلاوي بغلان ولایت ته سفر وکړ او هلته یې د (افغان ماشومانو لپاره د جرمني مرستې) مؤسیسې په مالي ملاتړ د بغلان ولایت په بورکې ولسوالۍ کې له ۱۵۰ کورنیو سره د خوراکي او غیر خوراکي توکو مرسته وکړه.
د دغه سفر په ترڅ کې د وزارت د معلوماتي تکنالوژۍ رئیس قاري عبدالمتین رحیمزي، د بشري سرچینو رئیس مولوي کریم شاه تیلوي او د یادې مؤسیسې مسؤلینو د سیمې اړمن کسان د سیمه ییزو مشرانو په مرسته په نښه کړل او وروسته یې هرې کورنۍ ته د دوی د اړتیا په اساس د (۹) قلمه توکې ووېشل.
په دغه مرسته کې د هرې زیانمنې کورنۍ لپاره یوه خېمه، دوه کمپلې، فرش، اوړه، غوړي، چای او نور خوراکي توکې شامل وو. زیانمو شویو کورنیو له هیوادوالو او مرستندویه بنسټونو څخه مننه وکړه، دوی ته د اوښتو زیانونو کچه یې لوړه وبلله او د لازیاتې همکارۍ غوښتنه یې وکړه.
