په کندز ولایت کې ۴۰ کلنه شخړه حل شوه
۱۴۴۵/۷/۲۵
په کندز ولایت کې د سرحدونو، قومونو او قبایلو چارو ریاست د یاد ولایت د لودین قوم تر منځ ۴۰ کلنه شخړه د یوې قومي جرګې په ترڅ کې حل کړه.
د جرګې پر مهال د یاد ولایت والی الحاج ملا نثاراحمد نصرت، د یاد ریاست رئیس مولوی احسان الله ثاقب، علماء کرامو، قومي مشرانو او د کندزولایت ټولومسؤلینو حضور درلود.
په پیل کې ښاغلي ثاقب ټولو ګډونوالو ته ښه راغلاست ووایه او خلک یې یووالي ته راوبلل، همداراز د یاد ولایت مسؤلینو او علماء کرامو د خبرو پر مهال د اسلام له نظره په پورتنۍ موضوع علمي نظرونه وړاندې کړل د سولې ګټې یې بیان کړې او دواړه قومونه یې سولې ته را وبلل.
په پاي کې دواړو قومونو د مسؤلینو په مخ کې یاد پلاوي ته عهد ورکړ چې نور دا شخړه پر دغه ځای پای ته ورسېده او له دې وروسته به په خپل منځ کې هیڅ کومه ستونزه ونه لري او له مسؤلینو څخه یې مننه وکړه چې په یاده موضوع کې یې له دوی سره پوره همکاري وکړه.
