د خوست او پکتیا ولایتونو اړوند د ډیورنډ فرضي کرښې څار او پلټنه
۲۷/۳/۱۴۴۵
د سرحدونو قومونو او قبایلو چارو وزارت د سرحدي پلټنو معینیت د خپل پلان سره سم د خوست او پکتیکا ولایتونو په مربوطاتو کې د ډیورنډ فرضي کرښه د ۲۸۵ کیلومتره په امتداد بررسي، څار او کتنه تر سره کړه. یاده بررسي د خوست د مرکز په شمول په ځاځي میدان، باک، علي شېر، ټني، سپېره او ګربز ولسوالیو او د پکتیکا په ګیانه او برمل ولسوالیو کې ترسره شوه.
د دغې پلټنې او څار په نتېجه کې د ډیورنډ فرضي کرښې په اوږدو کې د مېشتو قومونو له مشرانو سره ناستې وشوې، د کانونو او طبیعې زیرمو د تثبیت په برخه کې لومړني معلومات راټول او د خلکو ستونزې واورېدل شوې چې د حل په برخه کې به یې عملاً اجراات ترسره شي.
د یادولو وړ ده چې د هیواد د ټولو سرحدي پولو، صفري ټکو او ډیورنډ فرضي کرښې څار، پلټنه، د بندرونو نظارت، د سرحدي تخطیو مخنیوی او په نړیواله توګه د منل شویو سياسي پولو اړوند د افغانستان د ټولو سرحدونو بررسي او نظارت ددې وزارت یوه مهمه دنده ده، د سرحډي بررسيو رياست توانيدلی چې د هیواد د پولو او ډیورنډ فرضي کرښې دداسي ساحو څخه بررسي او څارنه ترسره کړي چې په تيرو ۵۰ کلونو کې يې هيڅ نوع څار او بررسي نه وه تر سره شوې.
