د هیواد اسلامي نظام، واحده رهبري او قیادت په نړۍ کې بې سارې ده
دوشنبه/۱۶/ذوالقعدة/۱۴۴۴
د حريت اوونيزې مسؤول او استازو د سرحدونو، قومونو او قبایلو چارو وزارت اړوند مسلکي معین مولوي احمد طه قادري سره په خپل کاري دفتر کې وکتل.
په دغه کتنه کې د حريت اوونيزې د استازو په مشرۍ داد محمد ناوک خبرې وکړې او د یاد معینیت څخه یې د وزارت په اړوندو لېسو کې د ليسو د فرهنګي کميټو په همکاري د ادبي، فرهنګي او فکري غونډو په دایرولو کې د همکارۍ غوښتنه وکړه. نوموړي وویل: دوئ هڅه کوي د بيلابيلو انجمنونو په دايرولو، د علمي او اکاډميکو شخصيتونو له لوري د علمي ليکچرونو په وړاندي کولو سره غواړي په زده کړيالانو کې د ازادې مطالعې، وينا او بيان هنر، ليکوالي او داسي نور استعدادونه وغوړوي، نوموړي هيله څرګنده کړه چې د وزارت اړوند ليسو کې د اړوندو ادارو په همغږي د زده کونکو د ذوق سره سم اوونيز انجمنونه جوړ کړي.
وروسته مسلکي معین ښاغلي قادري د دوی له نېک اقدام ستاينه وکړه او ویې ویل: حکومتداري په زور نه بلکې په هنر کیږي او که څوک غواړي چې د خلکو پر زړونو حکومت وکړي باید د هغوی له ستونزو ځان خبر کړي. هغه همدا راز وویل: د دې هیواد د اسلامي عقیدې او ذهنیت مخالفین د نړۍ په ډېرو برخو کې موجود دي، او د ځوانانو فکرونه په خپلو خرابو نظریو سره منحرف کوي، موږ او تاسو ته معلومه ده چې اسلامي نظام په دفاع منځ ته راځي او په علم بقاء حاصلوي، د دې نظام واحد قیادت، اطاعت او رهبرئ په نړۍ کې ساری نه لري، موږ د هیواد د پجو د فکري او علمي روزنې په برخه کې له تاسو سره پوره همکار یو.
د حريت اوونيزې مسؤول ښاغلي ناوک دغه راز په يوه جلا ناسته کې د وزارت د دعوت ارشاد له رئيس مفتي شفيع الله ثاقب سره هم وکتل او په ليسو کې د خپلو اوونيزو مجلسونو په اړه يې خپله موضوع ورسره شريکه کړه.
ښاغلي ثاقب صاحب د حريت اوونيزې د مسوول او همکارانو هڅې وستايلې او په دې برخه کې يې د هر راز همکارۍ ډاډ ورکړ.
