په ناور کې د څړځايونو پر سر د منازعاتو د حل په موخه د رياست الوزراء له لوري ټاکل شوي پلاوي غزني ولايت ته سفر وکړ
۵/ جمادي الثاني/۱۴۴۴ هـ ق
د رياست الوزراء له لوري د سرحدونو،قومونو او قبایلو چارو وزارت تر سرپرستي لاندي د څړځايونو پر سر د منازعاتو د حل ټاکل شوي لوړ رتبه هيئت چي د سرحدونو، قومونو او قبایلو چارو سرپرست وزير الحاج ملا نورالله نوري، د کرهڼې او مالدارۍ وزارت معين مولوي فضل الباري فضلي ، د کورنيو چارو وزارت نماينده د غزني والي مولوي محمد اسحاق اخندزاده، د لويې څارنوالۍ نماينده مولوي عبيدالله او د استخباراتو لوی رياست مرستيال محترم حاجي نجيب پکې عضويت لري د غزني ولايت د کوچي او ځايي خلکو تر منځ په ناور ولسوالي کې د څړځايونو پر سر د اوږدمهاله منازعاتو د حل په موخه ياد ولايت ته سفر وکړ.
ددې سفر پر مهال ياد پلاوي د غزني د والي الحاج محمد اسحاق اخندزاده او د همدې ولايت د سرحدونو، ق.ق چارو رئيس مولوي محمد اسحاق ادريس په شمول د کوچيانو او هزاره ګانو له يو شمېر مشرانو سره د ولايت د غونډو په تالار کې وکتل.
د کوچي او هزاره مشرانو په نماينده ګي يو يو تن مشر خبرې وکړې او د څړځايونو پر سر د منازعې د اساسي حل غوښتنه يې وکړه.
په پيل کې د پلاوي عضو محترم حاجي نجيب راغلو مشرانو ته په خبرو کې له ټولو مشرانو وغوښتل چې د معضلي د حل لپاره دي ټول په واقعي او ريښتينې توګه اقدام وکړي.
د پلاوي مشر د سرحدونو، قومونو او قبایلو چارو سرپرست وزير الحاج ملا نورالله نوري ناستو مشرانو ته لنډې خبرې وکړې؛ نوموړي پخپلو خبرو کې وويل: اسلامي امارت د ډاډمن امنيت تامينول او خلکو د ستونزو هوارول خپله وجيبه بولي، نوموړي د ياد پلاوي له لوري د وردګو، باميان او غور ولايتونو د کوچيانو او ځايي خلکو تر منځ د منازعاتو حل ته په اشارې زياته کړه: که تاسو هم همکاري وکړئ او دواړه لوري په ريښتني توګه پلاوي سره حقيقتونه شريک کړئ نو ددې معضلي اسانه حل ممکن دی.
د پلاوي له غوښتنې سره سم له دواړو جهتونو څخه شپږ شپږ کسه مشران انتخاب شول تر څو د يادې تنازع په هکله خپل معلومات او مشورې له پلاوي سره شريک کړي.
