د سرحدونو قومونو او قبایلو چارو سرپرست وزير د خوست ولايت د شيخ زايد پوهنتون څخه ليدنه ترسره کړه
د سرحدونو قومونو او قبایلو چارو سرپرست وزير محترم ملا نورالله نوري خوست ولايت د رسمي سفر پر مهال د خوست ولايت له پوهنتون څخه ليدنه وکړه او د پوهنتون استادانو او محصلینو ته يې لنډه وينا وکړه. ښاغلي نوري پخپله وينا کي وويل چي د نظام د بقا او تقويې لپاره د ديني زده کړو تر څنګ عصري زده کړې خورا اړينې دي او اسلامي امارت د ټولو تعليمي بنسټونو د تقويې لپاره جدي او ژمن دی. اسلامي نظام نه د ملا او طالب دی نه د انجنير، ډاکټر او دهقان بلکه اسلامي نظام د نړۍ پر سر د هر مسلمان وګړي وجيبه ده چي د اسلامي نظام د راوستلو هڅې وکړي. د اسلامي نظام يوه برخه د خدماتو عرضه کول او قوي اقتصاد رامنځته کول دي، ددې لپاره چي اسلامي نظام ښه تقويه او ټولې برخې يې تکمیل شوي وي نو په کار ده چي عصري زده کړې په اسلامي او عقيدوي چاپيريال کي ترسره کړو. اسلامي امارت به د هيواد ټولو بچيانو ته د هيواد دننه دمعياري زده کړو زمينه مساعده کړي. ښاغلي ملا نورالله «نوري» له محصلينو وغوښتل چي ټول هاند او هڅه وکړي چي خپلې لوړې زده کړې په ښه ډول سرته ورسوي په وينا يې د هيواد راتلونکی د همدې ځوانانو په لاسونو کي دی بايد د هيواد روښانه راتلونکی پخپله ترسيم کړي. د خوست ولايت شيخ زايد پوهنتون رئيس انجينير همايون معاويه د سرحدونو قومونو او قبایلو چارو سرپرست وزير ته ښه راغلاست ووايه او مننه يې وکړه چي د پوهنتون استادانو او محصلینو ته يې په خپل راتګ سره روحيه وبښله. ښاغلي نوري د پوهنتون د يو شمير استادانو په ملتيا د پوهنتون له بيلابيلو پوهنځيو څخه ليدنه هم تر سره کړه.
