د عامه تاسيساتو او ملي بنسټونو ويجاړول ستر او نه بخښونکی جنايت دی!
په دې وروستیو وختو کې د افغانستان د پرمختګ، ابادی او هوساينې دښمنان د برېښنا ستنې، پلونه، سړکونه، روغتونونه او نور ټولګټي تاسيسات په نښه کوي او له منځه يې وړي، چې د مکار دښمن دغه شان عملونه د دوې د جهالت او وحشت انتها او نه بخښونکی جنايت دی.
د افغانستان د خلکو دښمنان، چې له افغان ملي ځواکونو سره يې د جګړې په ډګر کې د مخامخ جګړې توان له لاسه ورکړی، د هېواد عام المنفعه بنسټونه د خپلو بادارانو د خوشالولو په خاطر په نښه کوي او له منځه يې وړي.
ترهګر بايد په دې پوه شي، چې د دغو کرغېړنو عملونو په ترسره کولو سره به هېڅکله هم خپلو شومو موخو ته ونه رسيږي.
د سرحدونو او قبایلو چارو وزارت په داسې حال کې، چې دغه شان کړنې په کلکه غندي له درنو ولسونو څخه غواړي، چې د خپلو ولسي ظرفيتونو څخه په استفادې سره د خپلو عامه بنسټونو په ساتنه او پالنه او د هغو د ویجاړولو په مخنيوي کې له خپل دولت سره همکاري وکړي او د ترهګرو پر وړاندې خپل یووالی او انسجام وساتي.
محب الله صمیم
د سرحدونو او قبایلو چارو وزیر
