د هېواد د بېلابېلو ولایتو له قومي مشرانو او مخورو سره ناسته!
د سرحدونو او قبایلو چارو وزیر ښاغلي محب الله صمیم نن له غرمې مخکې د غزني، لوګر، تخار، لغمان، کندز او نیمروز ولایتونو له قومي مشرانو او مخورو سره د خپل کار په دفتر کې وکتل.
په دې کتنه کې راغلو قومي مشرانو او مخورو د خپلو یو لړ سیمه ییزو ستونزو شریکولو ترڅنګ د جرګو او مرکو له لارې د سولې، امن، د قومونو جوړښت او د ملي یووالي به برخه کې د سرحدونو او قبایلو چارو وزارت کړنې او فعالیتونه ارزښتناک وبلل او د موجوده نظام څخه د ملاتړ په ترڅ کې یې له وزارت سره د هر راز همکاریو ډاډ ورکړ.
ورپسې ښاغلی محب الله صمیم پخپلو خبرو کې د راغلو قومي مشرانو او مخورو ستونزې پر ځای وبللې وې ویل: هڅه کوم، چې د خپلو قومي مشرانو او مخورو سره یو ځای د هېواد د آبادې او سوکالۍ لپاره کار وکړم او په دې برخه کې به خپلې هلې ځلې ونه سپموم.
