د افغانستان د بلوڅو قوم سرتاسري شورا له مشر او غړو سره کتنه!
د سرحدونو او قبایلو چارو وزیر ښاغلي محب الله صمیم نن له غرمې مخکې د افغانستان د بلوڅو قوم سرتاسري شورا له مشر، غړو او د کابل ولایت د قره باغ ولسوالۍ له یو شمېر قومي مشرانو سره د خپل کار په دفتر کې وکتل.
په دې کتنه کې بلوڅو قومي مشرانو د خپلو یو لړ سیمه ییزو ستونزو شریکولو ترڅنګ د وزارت له مشرتابه څخه مننه وکړه، چې تل یې د قومونو د انسجام او د اړیکو د پياوړي کولو په برخه کې نه ستړې کیدونکې هلې ځلې ترسره کړي.
دغه راز د یادې شورا مشر له موجوده نظام څخه د بشپړ ملاتړ په ترڅ کې وویل: وزارت تل دوی ته د ملي او فرهنګي ورځو د لمانځلو په برخه کې ونډه ورکړې او ستونزو ته یې پر وخت رسیدنه شوې ده.
ورپسې د سرحدونو او قبایلو چارو وزیر ښاغلي محب الله صمیم په خپلو خبرو کې د یادو قومي مشرانو ستونزې پرځای وبللې وې ویل: دا په ډاګه ده، چې بلوڅ قوم د تاریخ په اوږدو کې د نورو قومونو په څېر د خپل هېواد څخه په مېړانه دفاع کړې او تل یې په ملي مسایلو کې برخه اخیستې ده، زه به ستاسو درنو مشرانو ستونزې د حل په موخه تر اړوندو ادارو پورې ورسوم او په ګډه به ورته د حل لارې چارې پیدا کړو.
