کندز کې د ۱۵ کلنې دښمني تر څنګ ننګرهار او باميان ولايتونو کې هم جلاجلا شخړې هوارې شوې
دوشنبه ۳ صفرالمظفر ۱۴۴۷ د کندز ولايت د سرحدونو، قومونو او قبايلو چارو رئيس مولوي احسان الله ثاقب په دوامداره هڅو، د قومي مشرانو، علماء کرامو او ځايي خلکو په همکاري د شاو خوا ۱۵ کلونو اوږدمهاله دښمني په دوستي بدله کړه او ښکېلې کورنۍ د سولې په ټغر کښېناستې. ياده دښمني چې د ځمکې د ملکيت پر سر راپورته شوې وه او دواړو لوريو ته د درنو مالي تاوانونو برسيره ۵ تنه پکې وژل شوي او څو تنه نور پکې ټپيان شوي وو د مسؤلينو لخوا د څو ناستو په موده کې لومړی سولې ته راضي او بيا د يوې عادلانه پرېکړې له مخې يو بل سره غاړه په غاړه شول. په ورته مهال د ننګرهار ولايت په اتمه ناحيه کې د دوو کورنيو ترمنځ د يوې ترافيکې پېښې له امله راپورته شوې شخړه، چې په نتيجه کې يې يو کس وژل شوی و او ترمنځ يې ژور جنجالونه موجود و د ياد ولايت د سرحدونو، قومونو او قبايلو چارو رياست استازو له لوري حل او دواړو خواوو روغه سره وکړه. همداراز په باميان ولايت کې هم د ځمکو او څړځايونو پر سر راپورته شوې شخړه د باميان ولايتي ادارې او د ياد ولايت د سرحدونو، قومونو او قبايلو چارو آمريت په همغږۍ حل او ښکېلو خواوو سولې ته مخه کړه.
