پکتيا کې د دوو کورنيو ترمنځ ۶۰ کلنه دښمني په دوستۍ بدله شوه.
دوشنبه ۸ رجب المرجب ۱۴۴۷
دغه پخوانۍ دښمني د پکتيا ولايت د سرحدونو، قومونو او قبایلو چارو رياست د رئيس مفتي نصير احمد تائب په مشري د دغه ولايت د والي، قومي مشرانو، ديني عالمانو او متنفدينو په ملتيا د پرله پسې ناستو او هڅو په پايله کې د ميرزکي ولسوالي د ګرګين په سيمه کې هواره شوه.
ياده دښمني، چې له شاوخوا شپږو لسيزو راهيسې روانه وه په ترڅ کې يې درې تنه وژل شوي، ګڼ مالي زيانونه ورته رسېدلي او د غچ اخيستنې جدي ګواښونه يې هم ترمنځ موجود وو، چې مسؤلين په دې وتوانېدل ترڅو دغه شخړه د تفاهم او روغې جوړې له لارې پای ته ورسوي.
د روغي جوړې په يادو مراسمو کې دواړو خواوو په بشپړه رضايت سره تېر هېر کړل، يو بل ته يې بښنه وکړه او د ورورولي، سولې او ګډ ژوند ژمنه يې وکړه، چې په همدې سره يې د سولې غاړې سره ورکړې.
