په کونړ ولایت کې ۵ کلنه شخړه حل شوه
۲۸\۸\۱۴۴۵ هـ ق
په کونړ ولایت کې د سرحدونو، قومونو او قبایلو چارو ریاست په هلو ځلو، د قومي مخورو په منځګړیتوب د یاد ولایت د شلتن ولسوالۍ د سونو کلي د دوو کورنیو تر منځ ۵ کلنه شخړه حل شوه.
ياده شخړه چې په ترڅ کې یې یو تن وژل شوی و او پرلپسې پنځه کاله يې دوام موندلی و چې بالآخره قضیه محکمې ته ورسېده، د محکمې له لوري قضیه د حل په موخه یاد ریاست ته وسپارل شوه او د حل لپاره يې یاد ریاست د قومي مشرانو غونډه جوړه کړه.
د غونډې پر مهال د یاد ریاست رئیس ښاغلي ملا تحمید الله غازي او ځیني نورو قومي مشرانو په شخړه کې ښکېل دواړ اطراف سولې ته راوبلل، ښاغلي غازي د شریعت له نظره د عفوې او سولې فضایل بیان کړه او نور شخړه له منځه وړل د دواړو جانبینو لپاره خیر یاد کړ، تر څو دواړو کورنیو د پړېکړه لیک پر اساس یو له یو بل سره غاړه په غاړه شول او په خپل منځ کې د عادي ژوند تېرولو ژمنه وکړه.
