په کونړ ولایت کې ۲۰ کلنه شخړه حل شوه
۱۸/۱۰/۱۴۴۵
د کونړ ولایت د سرکاڼو ولسوالۍ د ادم درې سیمې د دوو کورنیو تر منځ ۲۰ کاله وړاندې رامنځته شوې شخړه، چې له امله یې دواړه لوریو ته مرګ ژوبله او مالي زیانونه هم اوښتي وو، تېره ورځ د سرحدونو، قومونو او قبایلو چارو رئیس مولوي تحمیدالله غازي او د یادې ولسوالۍ د مسؤلینو او قومي مشرانو په هلو ځلو په ورورګلوي بدله شوه.
د یادې شخړې د حل په موخه د یادو شویو اداراتو مسؤلینو له دواړو لوریو سره ناستې وکړې، تر هوکړې وروسته یې د دواړو ترمنځ د خیر پرېکړه اعلان کړه چې ښکېلو لوریو پرې قناعت وکړ.
د منازعې د حل دواړو غاړو د شخړې پر حل خوښي څرګنده کړه او ژمنه یې وکړه چې یو له بل سره به د وروڼو په څېر په سوله ییزه فضاء کې ژوند کوي.
