په کندز ولایت کې یوه ۱۵ کلنه شخړه حل و فصل شوه
د کندز ولایت په علي آباد ولسوالي کې د دوو کورنیو تر منځ پېښه شوې شخړه او بدۍ، چې له کبله یې له دواړو لوریو څخه پکې څلور تنه وژل شوي وو، نن د یوې ناستې په ترڅ کې حل او په دوستي بدله شوه.
یاده شوې شخړې له ۱۵ کلونو را په دې خوا دوام درلود چې نن ورځ د سرحدونو، قومونو او قبایلو چارو ریاست په همغږي او هلو ځلو حل و فصل شوه.
د دغې شخړې د حل په ناسته کې د سرحدونو، قومونو او قبایلو چارو رئیس مولوي احسان الله ثاقب، نورو مسؤلینو، قومي مشرانو او دیني عالمانو ګډون کړی وو.
د کندوز ولایت د سرحدونو قومونو او قبایلو چارو رئیس ښاغلي ثاقب غونډې ته په خپلو خبرو کې وویل چې یاد ریاست د خلکو تر منځ د یووالي د را منځته کولو په برخه کې کار کوي او د دوی هڅه داده چې د قومونو تر منځ تربګنۍ او بدۍ ختمې کړي ترڅو ټول هیوادوال د ورورۍ په فضاء کې ژوند وکړي.
نوموړي همدا راز زياته کړه چې د ا.ا.ا له بریا را وروسته یې د خلکو په همکارۍ لسګونه غټې او وړې شخړې حل کړې دي.
د غونډې په پای کې د ښکېلو لوریو له جملې دوو تنو د یادې شخړې پر حل کېدو خوښي وښوده او ویې ويل: جنګ د حل لاره نه ده، ټولو هیوادوالو ته مو دا پیغام دی چې په خپلو منځونو کې دي د وروڼو په شان ژوند وکړي.
