په کاپیسا ولایت کې یوه ۲۳ کلنه شخړه او بدي حل شوه
۹/۱/۱۴۴۵
د کاپیسا ولایت نجراب ولسوالۍ د ګیاوې د سیمې د دوو کورنیو ترمنځ را منځته شوې شخړه چې له ۲۳ کلونو را په دېخوا یې ادامه لرله نن ورځ د یوې غونډې په ترڅ کې په سوله بدله شوه. په دغه شخړه کې له طرفینو څخه ۳ تنه مړه او یو تن زخمي شوی و، چې نن د یاد ولایت سرحدونو، قومونو او قبایلو چارو آمریت او د سیمې د مشرانو په همغږي په وروولۍ بدله شوه. د دغې شخړې د حل په مراسمو کې د یاد ولایت د مختلفو اداراتو مسؤلینو، قومي مشرانو، دیني عالمانو او د مختلفو ولسوالیو مخورو حضور درلود. د غونډې په جریان کې د سرحدونو، قومونو او قبایلو چارو د رئیس مولوي صدیق الله صیاد په شمول نورو مسؤلینو او علماء کرامو د اسلام د مبارک دين په رڼا کې خبرې وکړې او د عفوي، بخشش په اړه یې معلومات وړاندې کړل او ټول مېشت قومونه یې د ورورګلوۍ په فضا کې ژوند کولو ته راوبلل. په پای کې د دواړو لوریو په اړه د ټاکل شوي کمیسیون، علماء کرامو او مشرانو نیول شوې پرېکړه ټولو ګډونوالو ته واورول شوه او دواړه ښکېل لوري په خوشحالۍ یوبل ته غاړه غړۍ شول.
